Creando mundos pa deprender

Les nuestres actividaes enmárquense dientro d’un movimientu global que fomenta un cambiu d’actitú na mocedá ante les tecnoloxíes nueves. El nuestru oxetivu ye que la xente mozo dexe de ser namás consumidor pa que pase a crear y tresformar col mundu dixital que lo arrodia.

Buenes

Si tienes un momentu, mostrámoste lo que facemos y por qué lo facemos

¿Por qué? Vivimos nun mundu dixital

Anguaño nadie dulda de que les tecnoloxíes nueves formen parte de la nuestra vida cotidiana. Poro, ye perimportante que faigamos un usu buenu d’elles pa poder disfrutales y saca-yos el máximu provechu. Robótiqu naz pa echate un gabitu nesa xera.

Acordies col INE, EL 92,3% de los neños y el 91,6% de les neñes d’ente 10 y 16 años tienen usao internet nos trés meses últimos. Sicasí ¿Tamos educando a esta xente mozo pa que faiga un usu responsable de tou esti mundu dixital que lo arrodia? ¿Decatámonos de cómo inflúi na construcción de les sos identidaes, gustos, intereses y formes de relacionase?

Les tecnóloxíes nueves son maraviyoses si sabemos cómo usales. Cuando se conocen los sos peligros y cómo xestionalos, namás nos queda disfrutar-yos los placeres: ayúdennos a deprender, compartir, construyir, imaxinar, comunicanos, trabayar o hasta enamoranos.

¿Ónde? Asturies: camín d’una comunidá tecnolóxica

Que ¿por qué n’Asturies?
Porque préstanos imaxinar una Asturies creativa y innovadora onde les tecnoloxíes nueves tean accesibles pa toles persones, dende les ciudaes más grandes hasta los últimos requexos rurales. Porque nos presta pensar que los neños y neñes que van construyir el futuru asturianu, inevitablemente tecnolóxicu, van facelo d’una manera xusta, igualitaria, sostenible y responsable.

¿Cómo? El poder de deprender xugando

Xugar actívanos pa explorar, crear, practicar y prebar maneres nueves d’afrontar los diferentes retos que vamos atopar a lo llargo de les nuestres vides. Cuando deprendemos xugando implicamos tol nuestru potencial n’acción, arriesgando y experimentando, desarrollando idees y sobre manera preguntes, creando conocimientu y iguando problemes. Poro, la nuestra metodoloxía pon en valor l’acción de xugar convirtiéndolo nun elementu d’apoyu pal desarrollu del conocimientu, yá qu’aquello que se deprende xugando depréndese pa siempre.

Nes nuestres actividaes trabayamos tanto los conocimientos científico-técnicos como les habilidaes sociales. Per aciu’l xuegu enseñamos matemátiques, programación o física mientres desarrollamos la creatividá, el trabayu a comuña, la comunicación positiva, el pensamientu críticu o la responsabilidá. Los nuestros equipos compónenlos dende inxenieros/es de montaxe, hasta guionistes y diseñadores, pasando per xente esperto en programación. D’esta miente, ven la importancia de tomar les sos propies decisiones al mesmu tiempu que necesiten trabayar en grupu p’aportar a un fin común.

“Enseñar a los nuestros neños/es y a la mocedá a programar pa que les maquines del futuru faigan lo que quieran paez meyor idea que dexar que pase xusto lo contrario.”

J. Paul Gibson

¿En qué creemos? Esto nun va de crear pequeños frikis...

En Robótiqu creyemos que la xente menudo pasa demasiáu tiempu consumiendo tecnoloxía, pero tamién creemos que ye al traviés d’ella como podemos educar nel so usu responsable. Asina, facemos por qu’entiendan cómo les tecnoloxíes nueves pueden afalar procesos colectivos como crear, construyir o compartir proyectos, en cuenta d’asociales al individualismu y al consumu compulsivu. Amás, creyemos na educación en valores como la exa tresversal pa fomentar la igualdá, el compañerismu y el respetu mutuu.

Falen ellos/es Según los/es nuestros/es peques, aprenden cosas como:

wordle2